دن و رات کی تین ساعتوں کی دعا

ابن بابویہؒ نے صحیح سند کے ساتھ امام جعفر صادق علیہ السلام سے روایت کی ہے کہ جو شخص ہر روز سات مرتبہ یہ دعا پڑھے:

میں خدا سے جنت مانگتا ہوں اور جہنم سے خدا کی پناہ لیتا ہوں ۔

تو جہنم کہتی ہے کہ خدایا تو اسے مجھ سے بچا لے۔ دیگر معتبر سند کے ساتھ آپ سے روایت کی گئی ہے کہ اگر کوئی مومن روزانہ چالیس گناہ کبیرہ کرے اور پھر پشیمان ہو کر یہ کلمات پڑھے تو خداے تعالیٰ اس کے گناہ بخش دے گا۔

اس خدا سے معافی مانگتا ہوں کہ نہیں کوئی معبود مگر وہ زندہ پائندہ

آسمانوں اور زمین کو پیدا کرنے والا جلال و اکرام کا مالک

اور سوال کرتا ہوں کہ وہ میری توبہ قبول کر لے۔

ایک اور معتبر سند کے ساتھ آنجنابؑ سے روایت ہے کہ جو شخص روزانہ سات مرتبہ یہ کہے:

خدا کی حمد ہے ہر اس نعمت پر جو پہلے ملی تھی یا اب ملی ہے۔

تو اس نے گذشتہ اور آئندہ نعمتوں کا شکر ادا کیا۔

معتبر سند کے ساتھ امام جعفر صادق علیہ السلام ہی سے روایت ہے کہ جو شخص ہر روز پچیس مرتبہ یہ دعا پڑھے:

اے اللہ بخش دے تمام مومنین و مومنات کو اور تمام مسلمین و مسلمات کو۔

تو حق تعالیٰ اس کے لیے تمام گزرے ہوئے اور آئندہ قیامت تک آنے والے مومنوں کی تعداد کے برابر نیکیاں لکھ دے گا، اتنی ہی تعداد میں اس کے گناہ بخش دے گا اور بہشت میں اس کے اتنے ہی درجات بلند کر دے گا۔

معتبر سند کے ساتھ آپؑ ہی سے روایت ہے کہ جو شخص روزانہ سو مرتبہ کہے:

نہیں طاقت و قوت مگر جو اللہ سے ہے۔

تو خدائے تعالیٰ اس سے ستر قسم کی بلائیں دور کر دے گا جن میں سب سے کم تر رنج و غم دور کر دینا ہے اور ایک دوسری روایت کے مطابق اس شخص کو فقر کبھی دامن گیر نہ ہو گا۔

شیخ کلینیؒ ،طبرسیؒ اور دیگر علماء نے حسن اور معتبر اسناد کے ساتھ امام جعفر صادق علیہ السلام سے روایت کی ہے کہ رسول اکرم روزانہ ستر مرتبہ

میں خدا سے معافی مانگتا ہوں۔

اور ستر مرتبہ

خدا کے حضور توبہ کرتا ہوں ۔

کہا کرتے تھے۔

کشف الغمہ اور امالی شیخ طوسیؒ میں معتبر سند کے ساتھ روایت کی گئی ہے کہ حضرت رسول نے فرمایا کہ جو شخص روزانہ سو مرتبہ کہے:

نہیں ہے کوئی معبود سوائے اللہ کے جو واضح حق کا بادشاہ ہے۔

تو وہ فقر و غربت اور وحشت قبر سے امان پا جائے گا، تونگری کا رخ اس کی طرف ہو جائے گا اور اس کے لیے جنت کے دروازے کھل جائیں گے۔ امالی میں لَا اِلٰہَ اِلَّا ﷲُ الْحَقُّ الْمُبِیْنَ نقل ہوا ہے اور ثواب الاعمال و محاسن برقیؒ میں سو کی بجائے تیس مرتبہ پڑھنے کا ذکر آیا ہے ۔

قطب راوندیؒ نے کتاب دعوات میں امام علی رضاؑ سے روایت نقل کی گئی ہے کہ رسول اللہ نے فرمایا: جو شخص یہ چاہتا ہے کہ ملائے اعلیٰ میں اس کی مجاہدین سے بھی زیادہ تعریف کی جائے تو اسے روزانہ یہ دعا پڑھنی چاہیئے۔ پس اگر اسے کوئی حاجت درپیش ہو گی تو وہ پوری کی جائیگی، اگر اس کا کوئی دشمن ہو گا تو یہ اس پر غالب آئیگا، اگر مقروض ہو گا تو اس کا قرض ادا ہو جائے گا اور اگر رنج و غم میں مبتلا ہو گا تو وہ دور ہو جائے گا یہ دعا ساتوں آسمانوں سے گزر کر لوح محفوظ تک جا پہنچتی ہے اور وہاں اس کیلئے لکھ دی جاتی ہے ، وہ دعا یہ ہے:

اللہ پاک و پاکیزہ ہے جیسے اسے ہونا چاہیئے۔

حمد خدا کے لیے ہے جیسی کہ ہونی چاہیئے

نہیں کوئی معبود مگر اللہ جیسا کہ ہونا چاہیئے

اللہ بزرگ تر ہے جیسا کہ اسے ہونا چاہیئے

نہیں کوئی حرکت و قوت مگر جو اللہ سے ہے

اور خدا رحمت فرمائے اپنے نبی محمدؐ پر اور ان کے اہل بیتؑ پر

اور وہ رحمت کرے تمام رسولوں اور نبیوں پر اس قدر کہ وہ راضی ہو جائے۔

معتبر سند کے ساتھ امام علی رضا علیہ السلام سے روایت ہے کہ اصحاب پیغمبر میں سے ایک شخص کو کہیں سے ایک خط ملا جسے وہ آنحضرتؐ کی خدمت میں لے آیا۔ آپ نے حکم فرمایا کہ تمام اصحاب اکٹھے ہوں، جب وہ اکٹھے ہو گئے تو حضرت رسول اکرم منبر پر تشریف لے گئے اور ارشاد فرمایا یہ وہ خط ہے جو حضرت موسیٰؑ کے وصی یوشع بن نون نے لکھا اور اس کا مضمون یہ ہے: بسم اللہ الرحمٰن الرحیم۔ یقیناً تمہارا پروردگار تمہارا دوست اور مہربان ہے، یقیناً خدا کے بہترین بندے گمنام پرہیز گار ہیں اور خدا کی بد ترین مخلوق وہ لوگ ہیں جو جھوٹی ریاست و حکومت کے طلبگار اور لوگوں میں معروف ہیں۔ پس جو شخص یہ چاہتا ہے کہ اسے کامل اور پورا ثواب ملے اور خدا کی نعمتوں کا شکر ادا کرے تو اسے چاہیئے کہ ہر روز یہ دعا پڑھے:

اللہ پاک و پاکیزہ ہے جیسے اسے ہونا چاہیئے۔

حمد خدا کے لیے ہے جیسی کہ ہونی چاہیئے

کوئی معبود نہیں مگر اللہ جیسا کہ اسے ہونا چاہیئے

نہیں کوئی طاقت و قوت مگر وہ جو اللہ سے ہے

اور خدا رحمت فرمائے حضرت محمدؐ پر جو نبی امی ہیں اور ان کے اہل بیت پر

خدا کرے تمام رسولوںؑ اور نبیوںؑ پر اس قدر کہ وہ راضی ہو جائے۔

بلد الامین میں رسول اللہ سے منقول ہے کہ جو شخص روزانہ دس مرتبہ

خدا کے نام سے بڑا رحم والا مہربان ہے

نہیں کوئی حرکت و قوت مگر وہ جو بلند و بزرگ خدا سے ہے

کہے تو وہ گناہوں سے اس طرح پاک ہو جائے گا کہ گویا آج ہی شکم مادر سے پیدا ہوا ہے، خدا اس سے ستر قسم کی بلائیں دور کر دے گا، جن میں دیوانگی، برص، جذام اور فالج بھی شامل ہیں اور خدا ستر ہزار فرشتے بھیج دے گا جو اس کیلئے استغفار کرتے رہیں گے۔

امام جعفر صادقؑ فرماتے ہیں جو شخص روزانہ سو مرتبہ کہے:

نہیں کوئی طاقت و قوت مگر جو خدا سے ہے

تو کبھی فقر و فاقہ کا شکار نہ ہو گا.

جو روزانہ سو مرتبہ کہے:

اللہ پاک تر ہے حمد خدا ہی کے لیے ہے

نہیں کوئی معبود سوائے اللہ کے اور اللہ بزرگ تر ہے۔

تو خدائے تعالیٰ اس کے بدن کو جہنم کی آگ پر حرام کر دے گا۔

بلد الامین میں حضرت رسول اکرم سے روایت ہوئی ہے کہ جو شخص روزانہ دس مرتبہ یہ دعا پڑھے تو حق تعالیٰ اس کے چار ہزار گناہان کبیرہ معاف کر دے گا، اسے سکرات موت، فشار قبر اور قیامت کے ایک لاکھ ہولناک مناظر سے بچا لے گا، اسے شیطان اور اس کے لشکروں سے محفوظ رکھے گا۔ اس کا قرض ادا فرمائے گا اور اس کے تمام رنج وغم دور کرے گا وہ یہ دعا ہے ۔

میں تیار ہوں کہ ہر دہشت پر کہوں نہیں کوئی معبود سوائے اللہ کے

ہر غم و اندیشے میں کہوں جو چاہے اللہ

ہر نعمت پر کہوں حمد ہے اللہ کے لیے

ہر راحت میں کہوں شکر ہے خدا کا

ہر عجیب امر پر کہوں پاک تر ہے اللہ

ہر گناہ پر کہوں اللہ سے معافی مانگتا ہوں

ہر مصیبت پر کہوں ہم اللہ کے لیے ہیں اور اسی کی طرف پلٹ جائیں گے

ہر تکلیف میں کہوں مجھے اللہ کافی ہے

ہر ہونی شدنی پر کہوں میں اللہ ہی پر بھروسہ کرتا ہوں

ہر دشمن کیلئے کہوں میں خدا کی پناہ لیتا ہوں

اور ہر اطاعت اور نافرمانی پر کہوں کہ

نہیں کوئی طاقت و قوت مگر وہ جو اللہ بلند و بزرگ سے ہے۔

شیخ کلینیؒ، ابن بابویہؒ اور برقیؒ نے معتبر اسناد کے ساتھ امام جعفر صادقؑ سے روایت کی ہے کہ جو شخص روزانہ دس مرتبہ یہ دعا پڑھے تو اللہ تعالیٰ اس کیلئے پینتالیس ہزار نیکیاں لکھ دے گا اس کی پینتالیس ہزار برائیاں مٹا دے گا اور بہشت میں اس کے پینتالیس ہزار درجے بلند کر دے گا۔ اس کو شیطانوں اور ظالموں کے شر سے محفوظ رکھے گا اور گناہ کبیرہ کا اس پر کوئی بس نہ چل سکے گا۔ ایک اور روایت کے مطابق وہ شخص ایسا ہو گا جیسے اس نے قرآن مجید کے بارہ ختم کیے ہوں اور خدا بہشت میں اس کے لیے مکان تیار کرے گا ، البتہ ابن بابویہؒ کی روایت میں دس مرتبہ پڑھنے کا ذکر نہیں آیا اور وہ دعا یہ ہے۔

میں گواہی دیتا ہوں کہ کوئی نہیں معبود سوائے اللہ کے

وہ یکتا ہے کہ اس کا کوئی شریک نہیں

وہ معبود ہے اکیلا یگانہ بے نیاز

کہ جس کی نہ کوئی زوجہ ہے اور نہ کوئی فرزند۔

ثواب الاعمال، کافی اور محاسن میں امام جعفر صادقؑ سے روایت ہے کہ حضرت رسول اکرمؐ نے فرمایا: جو شخص روزانہ پندرہ مرتبہ کہے:

اللہ کے سوائے کوئی معبود نہیں اور یہی حق ہے

اللہ کے سوائے کوئی معبود نہیں وہ ایمان بھی ہے اور تصدیق بھی

اللہ کے سوائے کوئی معبود نہیں اُسی کی عبدیت اور غلامی ہے۔

تو خدا نگاہ رحمت اس سے نہ پھیرے گا یہاں تک کہ اسے بہشت میں پہنچا دے گا۔

محاسن برقی میں حضرت رسولؐ سے روایت کی گئی ہے کہ جو شخص روزانہ سو مرتبہ سُبْحَانَ ﷲِ کہے تو اس کا ثواب کعبہ میں سو اونٹ قربانی کرنے سے زیادہ ہے۔

جو شخص سو مرتبہ اَلْحَمْدُ ﷲِ کہے تو یہ اس کے لیے سو غلام آزاد کرنے سے بہتر ہے۔

جو شخص سو مرتبہ اَللّٰهُ اَكْبَرُ کہے تو اس کا ثواب زین ولگام سمیت سو گھوڑے جہاد میں بھیجنے سے زیادہ ہے۔

اور جو شخص سو مرتبہ لَا اِلٰہَ اِلَّا ﷲُ کہے تو اس کے عمل سے کسی کا عمل بہتر و بیشتر نہیں ہو گا مگر اس کا جو یہ کلمہ اس سے زیادہ تعداد میں پڑھے گا۔

قطب راوندیؒ نے روایت کی ہے کہ بنی اسرائیل میں ایک عابد تھا کہ جس نے سالہا سال تک خدا کی عبادت کی تھی، ایک دن اس نے اللہ تعالیٰ سے دعا کی کہ پروردگارا! میں یہ جاننا چاہتا ہوں کہ تیرے نزدیک میری کیفیت کیا ہے؟ اگر تو نے میرے اعمال کو پسند کر لیا ہے، پھر میں ایسے اعمال میں اور اضافہ کروں ورنہ مرنے سے پہلے توبہ کروں! اس پر حق تعالےٰ نے اس کے پاس ایک فرشتہ بھیجا، جس نے آ کر کہا: تیرا کوئی بھی عمل خدا کے نزدیک قبول نہیں ہے! اس نے پوچھا: میری اتنی ساری عبادت کیا ہوئی؟ فرشتے نے کہا: تو نیکی کا جو بھی کام کرتا تھا لوگوں کو بتاتا رہتا تھا۔ اس طرح تو یہ چاہتا تھا کہ لوگ تیری تعریف کریں اور تجھے نیک و پارسا جانیں تو اب تمہارا اجر وہی ہے۔ جو تو چاہتا تھا یہ سن کر وہ عابد بہت پریشان ہوا اور گریہ کرنے لگا، فرشتہ دوبارہ اس کے پاس آیا اور کہا حق تعالیٰ فرماتا ہے کہ اب تو خود کو مجھ سے خرید لے اور اپنے بدن کی رگوں کے برابر صدقہ دیا کر! اس نے عرض کیا ، میں کیسے یہ کام کر سکتا ہوں فرمایا: روزانہ اپنی رگوں کی تعداد یعنی تین سو ساٹھ مرتبہ یہ کہا کرو:

اللہ پاک تر ہے حمد اللہ ہی کے لیے ہے، نہیں کوئی معبود سوائے اللہ کے

اور اللہ بزرگ تر ہے، نہیں کوئی طاقت و قوت مگر جو خدا سے ہے۔

اس نے کہا: پالنے والے! اس سے کچھ زیادہ عطا فرما! حکم ہوا کہ اگر اس سے زیادہ مرتبہ پڑھو گے تو زیادہ ثواب حاصل کرو گے۔

کلینیؒ نے معتبر سند کے ساتھ امام جعفر صادقؑ سے روایت کی ہے کہ حضرت رسولؐ اپنے بدن کی رگوں کی تعداد کے مطابق یعنی تین سو ساٹھ مرتبہ یہ کہا کرتے تھے:

حمد ہے اللہ کیلئے جو جہانوں کا رب ہے ہر حال میں بہت بہت حمد۔

ایک اور روایت کے مطابق آنحضرتؐ سے منقول ہے کہ جو شخص لگاتار دو مہینے تک روزانہ چار سو مرتبہ یہ دعا پڑھے: تو خداوند عالم اسے بہت زیادہ علم عطا کرے گا یا بہت زیادہ مال و عنایت فرمائے گا۔

وہ یہ دعا ہے:

معافی مانگتا ہوں اللہ سے کہ جس کے سوا کوئی معبود نہیں

وہ زندہ و پائندہ بڑا رحم والا مہربان، آسمانوں اور زمین کا ایجاد کرنے والا ہے

معافی مانگتا ہوں اپنے ہر ظلم ، جرم

اور زیادتی پر جو اپنے اوپر کیا اور اس کے حضور توبہ کرتا ہوں۔

شیخ طوسیؒ اور دیگر علما نے روایت کی ہے، سنت ہے کہ روزانہ یہ دعا پڑھے:

اے معبود! میں تجھ سے سوال کرتا ہوں تیری ذات کے نور کا واسطہ دے کر

جو روشن، زندہ، باقی اور بزرگی والا ہے

اور سوال کرتا ہوں بواسطہ تیری ذات کے نور کے

جو پاکیزہ ہے جس سے آسمان روشن ہو گئے

جس سے تاریکیاں چھٹ گیئں

اور اولین آخرین کے معاملات سنور گئے۔

یہ سوال کہ تو رحمت فرما محمدؐ اور ان کی آلؑ پر

اور میرے تمام امور کو بہتر بنا دے

کفعمیؒ نے امام محمد باقر علیہ السلام سے روایت کی ہے کہ جو شخص روزانہ یہ دعا پڑھے تو اللہ تعالیٰ اس کے دنیاوی اور اخروی امور کو خود سنبھالے گا۔

خدا کے نام سے میرے لیے اللہ کافی ہے میں اللہ پر بھروسہ کرتا ہوں

اے معبود! میں تجھ سے اپنے تمام امور کی بہتری کا سوال کرتا ہوں

اور تیری پناہ لیتا ہوں دنیا کی رسوائی اور آخرت کے عذاب سے۔

روایت ہے کہ جو شخص یہ دعا روزانہ سات مرتبہ پڑھے تو اس کے دنیا و عقبیٰ کے امور کی کفایت کی جائے گی۔

مجھے اللہ کافی ہے اللہ میرا رب ہے

نہیں کوئی معبود مگر وہی میں اس پر بھروسہ کرتا ہوں

اور وہ عرش عظیم کا مالک ہے

روایت ہے کہ جو شخص سال بھر تک روزانہ ایک مرتبہ یہ دعا پڑھے تو وہ اس وقت دنیا سے نہیں جائے گا جب تک کہ بہشت میں اپنا مقام دیکھ نہیں لے گا۔

پاک تر ہے وہ جو دائم و قائم ہے

پاک ہے وہ جو قائم و دائم ہے

پاک ہے وہ جو تنہا و یکتا ہے

پاک ہے وہ جو یگانہ و بے نیاز ہے

پاک ہے جو زندہ و پائندہ ہے

اللہ پاک ہے میں اس کی حمد کرتا ہوں

پاک ہے وہ زندہ جس کو موت نہیں آئے گی

پاک ہے وہ جو بادشاہ ہے باصفا

پاک ہے وہ جو ملائکہ اور روح کارب ہے

پاک ہے وہ جو بلند و بلند تر ہے

وہی پاک و بلند ہے ۔