نماز حضرت حجتؑ

یہ نماز مسجد جمکران میں ادا کی جاتی ہے جو قم المقدس سے تقریباً چار میل کے فاصلے پر ہے. شیخ نے اپنی کتاب نجم الثاقب کے باب ہفتم کی پہلی حکایت میں نقل کیا ہے کہ مذکورہ مسجد امام العصر ﴿عج﴾ کے حکم سے تعمیر کی گئی ہے. اس سلسلے میں انہوں نے لکھا کہ امام العصر ﴿عج﴾ نے حسن مثلہ جمکرانی سے فرمایا لوگوں سے کہو کہ وہ اس جگہ کی طرف توجہ کریں اس کا احترام کریں اور یہاں چار رکعت نماز بجا لایا کریں، ان میں سے دو رکعت تحیۃ المسجد کی ہوں کہ ہر رکعت میں سورۂ حمد کے بعد سات مرتبہ سورۂ توحید پڑھے اور رکوع و سجود کے اذکار بھی سات سات مرتبہ پڑھے۔ اس کے بعد دو رکعت نماز امام صاحب الزمان ﴿عج﴾ کے لئے اس طرح پڑھے کہ سورہ حمد کی قرأت میں اِیَّاكَ نَعْبُدُ وَاِیَّاكَ نَسْتَعِیْنُ کو سو مرتبہ پڑھے اور پھر سورۂ حمد تا آخر پڑھے، رکوع سجود کے اذکار سات سات مرتبہ پڑھے اور پھر دوسری رکعت کو بھی اسی طرح بجا لائے۔ جب نماز تمام ہو جائے تو لا الہ الا اللہ کہے اور تسبیح حضرت زہرا سلام اللہ علیہا پڑھے۔ اس کے بعد سر سجدے میں رکھ کر محمد و آل محمد پر سو مرتبہ صلوات بھیجے اس بارے میں خود امام زمان ﴿عج﴾ کا فرمان ہے:

پس جس نے اس مسجد میں دو رکعت نماز پڑھی گویا اس نے خانہ کعبہ میں پڑھی۔

شیخ طبرسیؒ نے نجم الثاقب میں کتاب کنوز النجاح سے نقل فرمایا ہے کہ حضور امام الزمان عجل اللہ فرجہ کی طرف سے یہ حکم صادر ہوا ہے کہ جسے درگاہ الہی میں کوئی حاجت پیش کرنا ہو تو وہ شب جمعہ کی آدھی رات کے بعد غسل کرے اور جائے نماز پر جا کر دو رکعت نماز ادا کرے پہلی رکعت میں سورۂ حمد پڑھے اور جب اِیَّاكَ نَعْبُدُ وَاِیَّاكَ نَسْتَعِیْنُ پر پہنچے تو اسے سو مرتبہ دہرائے اور پھر سورۂ حمد تا آخر پڑھے، اس کے بعدایک مرتبہ سورۂ تو حید کی تلاوت کرے اور رکوع سجود بجا لائے اور رکوع میں سات مرتبہ کہے:

پاک ہے میرا رب عظمت والا ہے اس کی حمد کرتا ہوں ۔

اور دونوں سجدوں میں سات سات مرتبہ پڑھے:

پاک ہے میرا رب بلند تر ہے میں اس کی حمد کرتا ہوں ۔

اسی طرح دوسری رکعت بجا لائے اور نماز تمام کرنے کے بعد درج ذیل دعا پڑھے تو اللہ تعالیٰ یقیناً اس کی دعا قبول فرمائے گا بشرطیکہ وہ قطع رحمی کیلئے نہ ہو وہ دعا یہ ہے ۔

اے معبود! اگر میں تیری اطاعت کروں تو تیرے لئے حمد ہے

اگر تیرے لئے نافرمانی کروں تو تیری حجت مجھ پر قائم ہے

تیری طرف سے راحت اور تیری طرف سے کشائش ہے

پاک ہے وہ جو نعمت دیتا ہے اور قدر کرتا ہے

پاک ہے وہ کہ مقدر کرتا ہے اور معافی دیتا ہے

اے معبود! اگر میں نے نافرمانی کی ہے

تو بھی ان باتوں میں تیری اطاعت کی ہے جو تیرے ہاں پسندیدہ ہیں

اور وہ ہیں تجھ پر ایمان رکھنا اور تیرے لئے فرزند قرار نہ دینا اور کسی کو تیرا شریک نہ بنانا

یہ مجھ پر تیرا احسان ہے ان باتوں میں تجھ پر میرا احسان نہیں

اے معبود! میں تیری جو نافرمانی کی ہے تو وہ خود کو بڑا سمجھنے کی وجہ سے نہیں

اور تیری بندگی سے نکل جانے کی وجہ سے نہیں اور نہ تیری ذات کے انکار کی وجہ سے ہے

بلکہ میں اپنی خواہشات کے پیچھے چلا اورشیطان نے مجھے پھسلا دیا

پس تیری حجت اور بیان مجھ پر تمام ہے

اگر تو مجھے عذاب کرے تو یہ میرے گناہوں کا بدلہ ہے ظلم نہیں

اور مجھے بخش دے تو یہ تیرا رحم ہو گا کیونکہ تو سخی و کریم ہے

پھر اس وقت تک

یا کریم یا کریم

کہے جب تک سانس نہ رک جائے اس کے بعد کہے:

اے ہر چیز سے امان میں رکھنے والے کہ ہر چیز تجھ سے خوف کرتی ہے اور ڈرتی ہے

سوال کرتا ہوں اس لئے کہ تو ہر چیز سے امن میں ہے اور ہر چیز تجھ سے خوف کھاتی ہے

یہ کہ تو سرکار محمد وآل محمد پر رحمت فرما

اور یہ کہ امان میں رکھ مجھ کو میرے خاندان اور اولاد کو

اور جو نعمتیں تو نے مجھے دی ان کو بھی

حتی کہ نہ کسی سے خوف کھاؤں نہ کسی چیز سے ڈروں ہمیشہ تک

بے شک تو ہر چیز پر قدرت رکھتا ہے

ہمیں کافی ہے اللہ جو بہترین کارساز ہے

اے نمرود کے مقابل ابراہیم کو کافی اور اے فرعون کے مقابل موسٰیؑ کو کافی

تجھ سے سوال کرتا ہوں کہ تو رحمت فرما محمد وآل محمد پر

اور میری مدد فرما فلاں بن فلاں کے شر میں ۔

فُلَانِ ابْن فُلَان کی بجائے اس شخص کا نام لے جس سے نقصان کا اندیشہ ہو۔ حق تعالیٰ سے دعا کرے کہ وہ اس کے نقصان سے بچائے تو یقیناً اللہ تعالیٰ اسے اس شخص سے پہنچنے والے نقصان سے محفوظ رکھے گا۔ اس کے بعد سر سجدے میں رکھ دے خدا کے حضور گڑگڑائے اور اپنی حاجات طلب کرے۔ پس جو مومن مرد و زن یہ دعا پڑھے تو اس کی حاجت برآری کیلئے اسی دن اور اسی رات آسمان کے دروازے کھل جائیں گے اس کی دعا قبول ہو گی خواہ وہ کسی بھی حاجت کیلئے ہو، یہ کشادگی ہم پر اور سب لوگوں پر خداوند عالم کے احسان و کرم کی وجہ سے ہے۔

مؤلف کہتے ہیں فاضل شیخ طبرسیؒ نے بھی مکارم اخلاق میں یہ دعا نقل کی ہے لیکن اس کے آغاز میں اَللّٰہُمَّ اِنْ كُنْتُ عَصَیْتُكَ کی بجائے اِنْ كُنْتُ قَدْ عَصَیْتُكَ آیا ہے، حَتّٰی لَاَ اخَافُ کے بعد اَحدًا کا اضافہ ہے، فِرْعَوْنَ کے بعد اَسْئَلُكَ ہے اور باقی دعا وہی ہے جو ابھی نقل کی گئی ہے۔