برص کے لئے دعا

یونس کا بیان ہے کہ میری آنکھوں کے درمیان برص کی سفیدی ظاہر ہوئی تو میں نے اس کی شکایت امام جعفر صادق علیہ السلام سے کی، تو آپ نے فرمایا وضو کر کے دو رکعت نماز پڑھو اور پھر کہو:

اے اللہ اے بڑے رحم والے مہربان، اے دعاؤں کے سننے والے

اے بھلائیاں عطا کرنے والے، مجھے دنیا اور آخرت میں بھلائی عطا فرما

اور مجھے دنیا وآخرت کے شر و برائی سے بچا لے

میری وہ بیماری دور کر جسے محسوس کرتا ہوں

اس نے میرا کام خراب کیا اور غم لگا دیا۔

یونس کہتے ہیں کہ میں نے ایسا ہی کیا اور خدا تعالیٰ نے مجھ سے برص کی بیماری دور کر دی، الحمد للہ۔ کتاب عدۃ الداعی میں روایت ہے کہ امامؑ نے اس سے فرمایا جب رات کا تیسرا حصہ آ جائے تو اٹھ کر وضو کرو اور نماز تہجد بجا لاؤ تو پہلی رکعت کے دوسرے سجدے میں کہو ۔

اے بلند اے بزرگ اے بڑے رحم والے اے مہربان

اے دعاؤں کے سننے والے اے بھلائیاں عطا کرنے والے

رحمت فرما محمدؐ و آلؑ محمدؐ پر

اور مجھ کو دنیا وآخرت کی بھلائی عطا کر جیسی کہ تیری شان ہے

مجھ سے دنیا و آخرت کی شر و برائی دور رکھ جیسے تیری شان کے لائق ہے

اور میری یہ تکلیف دور کر دے کہ اس نے مجھے غم زدہ بنا رکھا ہے ۔

اور دعا پڑھتے ہوئے خوب گڑ گڑاؤ۔ یونس کہتے ہیں کہ میں نے امامؑ کے فرمان کے مطابق عمل کیا تو ابھی کوفہ نہیں پہنچ پایا تھا کہ شفایاب ہو گیا۔

نیز برص کے لئے یہ بھی وارد ہوا ہے کہ کسی برتن پر شہد سے سورۂ یٰسین لکھے اور اسے دھو کر پیے جیسا کہ بواسیر کے لئے بھی یہی وارد ہوا ہے۔ اسی طرح تربت امام حسین علیہ السلام ﴿خاک شفا﴾ کو بارش کے پانی میں گھول کر پینا بھی برص کے لئے مفید بتا یا گیا ہے۔ نیز مہندی میں نورہ ملا کر ملنا بھی مروی ہے ۔