خدائے عظیم و حلیم کے سوا کوئی معبود نہیں رب عرش بریں کے سوا کوئی سزاوارِ عبادت نہیں۔ تمام حمد عالمین کے پالنے والے خدا ہی کیلئے ہے اے خدا میں تجھ سے تیری رحمت اور یقینی مغفرت کے اسباب کا سوال کرتا ہوں ہر نیکی سے حصہ پانے اور ہر گناہ سے بچاؤ کا طلبگار ہوں اے معبود! میرے ذمہ کوئی ایسا گناہ نہ چھوڑ جسے تو معاف نہ کرے۔ کوئی غم نہ دے جسے تو دور نہ کر دے بیماری نہ دے مگر وہ جس سے شفا عطا کر دے۔ عیب نہ لگا مگر وہ جسے تو پوشیدہ رکھے رزق نہ دے مگر وہ جس میں فراخی عطا کرے، خوف نہ ہومگر جس سے تو امن عطا کرے برائی نہ آئے مگر وہ جسے تو ہٹا دے کوئی حاجت نہ ہو مگر جسے تو پورا فرمائے اور اس میں تیری رضا اور میری بہتری ہو۔ اے سب سے زیادہ رحم کرنے والے۔ آمین اے عالمین کے پالنے والے

اللہ ہی سے متوسل ہوتا ہوں، اللہ ہی پر اعتماد ہے اور اللہ ہی پر بھروسہ کرتا ہوں

اے معبود! اگر میرا گناہ بڑا ہے تو تیری ذات سب سے بلند ہے۔ اگر میری کوتاہی بڑی ہے تو تیری ذات بزرگ تر ہے اور اگر میرا بخل دائمی ہے تو تُو زیادہ دینے والا ہے اے اللہ! اپنے عظیم عفو سے میرے بڑے گناہ بخش دے اپنے لطف وکرم سے میری بہت سی کوتاہیاں معاف کر دے اور اپنے فضل اور عطا سے میرا بخل دور کر دے۔ یا خدایا! ہمارے پاس جو نعمت ہے وہ تیری طرف سے ہے تیرے سوا کوئی معبود نہیں۔ میں تجھ سے بخشش چاہتا اور تیرے حضور توبہ کرتا ہوں

اس خدا سے بخشش چاہتاہوں جس کے سوا کوئی معبود نہیں وہ زندہ وپائندہ ہے بڑے رحم والا مہربان، صاحب جلال و اکرام ہے میں اس سے سوال کرتا ہوں کہ وہ توبہ قبول فرمائے اپنے عاجز، خاضع بندے کی محتاج، مصیبت زدہ، مسکین، بے چارہ، طالبِ پناہ بندے کی جو اپنے نفع ونقصان کا مالک نہیں ہے نہ ہی اپنی موت وحیات اور آخرت پر اختیار رکھتا ہے

اے معبود میں تیری پناہ چاہتا ہوں سیر نہ ہونے والے نفس سے خوف نہ رکھنے والے دل سے نفع نہ دینے والے علم سے قبول نہ ہونے والی نماز سے اور نہ سنی جانے والی دعا سے تیری پناہ چاہتا ہوں اے معبود! میں تجھ سے سوال کرتا ہوں کہ مجھے مشکل کے بعد آسانی دکھ کے بعد سکھ اور تنگی کے بعد فراخی دے یا خدایا! ہمارے پاس جو تیری نعمت ہے وہ تیری طرف سے ہے , تیرے سوا کوئی معبود نہیں، میں تجھ سے بخشش چاہتا اور تیرے حضور توبہ کرتا ہوں